Памирге болгон жол Оштон башталат!

Оштогу өзгөчө эстеликтердин бири! Памир тракты – дүйнөдөгү эң бийик тоолуу жолдордун бири, 1894-жылы Россия империясынын армиясынын саперлору Мицкевич, Бураковский жана Зараковский тарабынан эски кербен жолдорун бойлой салынган.

Улуу Памир же “Дүйнөнүн чатыры” дайыма басып алууга жана өз бийлигин жүргүзүүгө аракет кылган империялар менен мамлекеттердин кызыгуусун жаратып келген. Советтер Союзу да мындан четте калган эмес.

Памирди басып алуунун советтик тарыхы символикалуу түрдө 1933-жылдын 7-ноябрында Оштон Хорогго биринчи жүк ташуучу автоунаа келгенде башталган. Бул окуяны эскерип, 1987-жылы ушул жерде жашаган №3333 аскер бөлүгүнүн аскер кызматкерлеринин демилгеси менен Ошто Памирди басып алгандарга арналган чыныгы сейрек кездешүүчү ГАЗ-АА В жүк ташуучу унаасы менен эстелик орнотулган.

2007-жылы тарыхый экспонат Бишкектеги Куралдуу күчтөрдүн музейине өткөрүлүп берилген. Тилекке каршы, оригиналдуу постамент ошол убакта бузулган. 2012-жылы эстеликти толугу менен калыбына келтиришкен, ал эми атактуу ГАЗ-АА жүк ташуучу унааны автобатальондун (№3333 бөлүк) ардагеринен табышкан.

Жаңы жолду тейлөө үчүн 1935-жылы Ошто жана Хорогдо жайгашкан эки автобазасы бар Памир өндүрүштүк автотранспорттук бирикмеси түзүлгөн. 1948-жылы жолду капиталдык оңдоо башталган. 1960-жылы Алай өрөөнү менен Тоолуу Бадахшанга жыл бою жүрүүчү автоунаа байланышы түзүлгөн. 1984-жылы жолдун дээрлик бардыгына асфальт төшөлгөн.

Ош-Хорог жолу “Чыгыш Памир тракты” деп аталган. Анын узундугу 701км түзгөн. Ал үч ашуу аркылуу өткөн: Талдык (3 615 км), Кызыл-Арт (4 280 км) жана Ак-Байтал (4 655км). Памир трактынын жолу эл аралык автоунаа карталарында М41 жолунун курамы катары белгиленген. Бул жылдын бардык мезгилинде жүрүүгө мүмкүн болгон эң кооз бийик тоолуу жолдордун бири.