Ош ашы

Аш – бул Оштун негизги тамагы! Бекеринен шаар менен тамактын аталышы окшош болбосо керек. Ошто Ташкент же Самарканд ашынан айырмаланган, аштын классикалык түрүн жасашат. Андижан, Маргилаң жана Өзгөндө жасалган аштардын вариациялары менен окшоштугу бар.

Ош ашынын сыры “девзира” сортундагы күрүчтө. Бул жеңил жылмаланган күрүчтүн сортторунун жалпы аталышы, бул ыкма анын сууну сиңирүү жөндөмүн жогорулатат, бул аш жасалуучу күрүчтүн абдан маанилүү сапаты.

Кара-Дарыя жана Жазы дарыяларынын жайылмаларындагы темирдүү топурактарда өскөн Өзгөн “девзирасынын” мүнөздүү өзгөчөлүгү – бул анын данын бойлой созулган узунунан кеткен кызыл сызык. Ошондон улам бул күрүчтүн түсү кызгылт түстөн күрөң түскө чейин болот. Ак “девзира” же чунгар күрүчү да бар (Баткен облусунун Чоң-Кара жергесинде өсөт), ал бермет, ачык күрөң жана жалтырабаган саргыч түстө болот.

Күрүч сатып алууда дайыма сатуучудан күрүчтүн нымдуулукту кандай сиңире тургандыгын жана аш жасоо үчүн аны качан сууга чылап коюу керек экендигин тактап алууну эсиңизден чыгарбаңыз.

Ош ашын кафелерден табуу кыйын, анткени аны чайханаларда жасоо адатка айланган. Бул жерде Оштун башкы тамагын даярдоочу чайханалардын эки түрү бар. Биринчиси, ашты алдын ала макулдашылган убакытка даярдап беришет, экинчисинде ашты сиз өзүңүз даярдасаңыз болот. Бул үчүн сиз бардык керектүү кошулмаларды өзүңүз алып келип, отун жана казандын ижарасы үчүн акы төлөйсүз.

Чайханаларда 1 кг күрүчтү бир нече адамга эсептөө менен буйрутма беришет, буга эт жана май, сары сабиз кошулат. Кээде бул суммага бир нече табак “шакарап” (помидор жана пияздан жасалган салат) кошуп беришет. Чайханаларда тамактануу үчүн секиси бар бөлмөнү же ачык жайдагы орундуктарды беришет. Бул жерге азык-түлүк, салат, шириндиктерди жана суусундуктарды кошо ала келсеңиз болот. Эч кандай тыюулар жок. Ошондуктан, оштуктар кечки убакытты чайханаларда өткөрүүнү жакшы көрүшөт.