Кол өнөрчүлөр

Эски базар өз кол өнөрүнүн сырларын бекем сактаган кол өнөрчүлөр менен белгилүү, ал эми алардын буюмдарына ушул күнгө чейин жергиликтүү тургундардын суроо-талабы жогору. Алар буюмдардын сапатын жана көпкө чыдамдуулугун баалашат.

Жаркыраган чыгыш кездемелери сатылган катарлардын артындагы эски темир усталардын катарында иштеген устага ушул күнгө чейин чайнек, самоор жана башка ашкана буюмдарын алып келишет, ал аларды калыбына келтирип берет. Улгайган уста күн нуруна көзүн кысып жылмаюу менен чайнектерге экинчи өмүр берет.

Заманбап курулуш дүкөндөрүнөн жергиликтүү ашпозчуларга жана набайчыларга керек болгон көптөгөн буюмдарды табууга болбойт. Эски базардан гана набайчылар кызыган тандырга жабаардан мурун өз нандарын кооздогон чекичтерди табууга болот.

Алардан кийин эле чатырчалардын алдында даяр жыгач бешиктер илинип турат. Миңдеген жылдардан бери алардын формасы жана колдонуу багыты өзгөргөн жок. Бешиктер конструкциясы, оймо-чиймеси, оюусу жана гүлдүү гаммасы менен жеңил айырмаланат. Бешиктин эң башкы касиети – бул бала үчүн ыңгайлуулук жана жайлуулук. Кыздар менен балдардын бешигинде оюулардан жана заара кылуучу түзүлүштөрүнөн башка принципиалдуу айырмачылыктар жок.

Бешиктердин формасы жана каркасы жүздөгөн жылдардан бери өзгөрүлгөн эмес. Жабууларындагы оймо-чиймелер гана кездемеге жана анын түсүнө жараша айырмаланат. Башкы жабуусун салттуу түрдө баркыт кездемеден тигишкен. Бешиктер талдан, карагайдан, кызыл карагайдан жана өрүктөн жасалган. Бир үй-бүлөнүн бир нече муундарынын бешик жасоо менен алектениши салт болуп калган. Алардын ар биринин өз милдеттери бар, бирок эң улуусу дайыма башчы болуп, ал өз өнөрүнүн бардык сырларын билген.

Алардан алыс эмес жерде ат жабдыктарын, жалпысынан алганда, ат чабууга, ээр чабууга жана аттарды үйрөтүүгө керектүү түрдүү буюм-тайымдарды сатуучулар жайгашкан. Мурун мунун бардыгы эски кербен сарайда сатылчу, ал жер кийин кафеге айланган.