Көркөм сүрөт музейи

Тургунбай Садыков атындагы Ош облустук көркөм сүрөт музейи жергиликтүү музейлердин эң жашы. Ал 2004-жылы жергиликтүү сүрөтчүлөрдүн демилгеси менен ачылган. Бул укмуштуудай музей кол өнөрчүлөрдүн тарыхый кварталында жайгашкан жана Абдулла-хан IIнин тарыхый жума мечит-рабатына чектешет. Көркөм сүрөт музейи мурунку Ош облустук край таануу музейинин имаратында жайгашкан. 1974-жылы экинчи кабатында экспозициялары бар административдик корпус курулган,  бул жерде азыркы учурда көркөм сүрөт музейи жайгашкан.

Буга чейин бардык вернисаж, көргөзмө, перфоманстар Сүрөтчүлөр союзунун облустук бөлүмүнүн көргөзмө залында жана жалпы Кыргызстан боюнча Кара-Суу районунда кадимки колхоздо ачылган жалгыз картина галереясында өткөн. Музей ачылгандан кийин ага бул картина галереясынан 37 иш алынып келинген. Тилекке каршы, азыркы учурда бул галерея жабылган.

Көркөм сүрөт музейи өз маңызы боюнча Кыргызстандын түштүгүндөгү жалгыз музей.  Музей коллекциясын 680ден ашык картина, скульптура, графикалык иштер жана колдонмо искусствосу түзөт. Жергиликтүү сүрөтчүлөрдүн дээрлик бардыгы музейге өздөрүнүн иштеринен акысыз түрдө эки даанадан өткөрүп беришкен.

Музейге белгилүү чеберлер Гапар Айтиев, Ольга Мануйлова, Аман Асранкулов, Баатыр Жалиев, Мырза Омуркулов, Леонтий Горбунов жана башка сүрөтчүлөрдүн эмгектери коюлган.

Ош шаарынын алгачкы сүрөтчүлөрүнүн бири Урумбай Ахуновдун иштери музей экспозициясында өзгөчө орунду ээлейт, анын ХХ кылымдын башындагы Оштун сүрөттөрү визуалдык архивдик күбө катары көрүнүп турат. Анын сүрөттөрүнөн шаардын тарыхын үйрөнүүгө болот, анткени сүрөтчү байыркы Ошту кылдаттык менен чагылдырган.

Музейде туруктуу түрдө ар түрдүү көргөзмөлөр жана перфоманстар өткөрүлүп турат. Азыркы замандын алдыңкы сүрөттөрүнөн тартып, Сулайман-Тоого арналган пейзаждуу тартуулардын көргөзмөсүнө чейин көрсөтүлөт. Оштук сүрөтчүлөрдүн оригиналдуу мүнөздө тартылган совет реализми стилиндеги иштери эң көп кызыгууну жаратат. Музейдин коллекциясы дайыма толукталып турат.