Эстеликтер алмашкан доорлордун символу сыяктуу

Оштун борбордук аянтында коммунисттердин жол башчысы Владимир Лениндин эстелиги дагы деле турат, ал 1985-жылдын май айында тургузулган. 11 метр бийиктиктеги эстелик 12 метрлик постаментте көтөрүлгөн. Долбоордун автору совет скульптор-монументчиси Николай Томский эстеликтин ачылышына бир жыл калганда каза болгон. Айтмакчы, Томский мурунку Советтер союзундагы Лениндин көптөгөн эстеликтеринин автору болуп саналат.

Ошто Лениндин эң биринчи эстелиги 1925-жылдын 1-майында шаардын эски бөлүгүнө клубдун алдына коюлган. Кийинчерээк аны Раззаков (мурунку Исфана) шаарына которушкан. Оштогу Лениндин башка эң белгилүү эстеликтери азыркы Алай ханышасы Курманжан Датканын эстелиги турган жерде жана православ чиркөөсүнүн алдында болчу.

Совет өкмөтүнүн башчысы Иосиф Сталиндин эстеликтери коммунисттик партиянын сталиндик маданиятты жокко чыгарган атактуу XX съездинен кийин шаар аянттарынан жана көчөлөрүнөн жок болуп кеткен. Алардын эң белгилүүсү ушундай эле аталыштагы көчөдө орнотулган болчу, азыр ал жерде “Өчпөс от” эстелик комплекси жайгашкан.

Сталиндин башка белгилүү эстелиги сейил бактын (Токтогул акындын урматына коюлган) борбордук кире беришинде болгон, ал Лениндин эстелигинин маңдайындагы постаментте турган. Азыр алардын орду гүл өстүрүлгөн чоң идиштерге айланган.

“Өчпөс от” комплексинин тарыхы кызыктуу, ал дагы совет бийлигинин идеологиялык каршылаштары менен болгон күрөштө каза болгон советтик аскер башчыларга арналган. Православ храмынын (совет мезгилинде Маданият үйү жана облустук филармония болгон) артында алардын аттары жазылган эстелик такталар орнотулган. Бүгүнкү күндө комплекстин бул бөлүгү 1986-жылы Чернобыль АЭСтеги кырсыкты жоюуга катышкан советтик жарандардын эстелиги болуп кайра жасалган.

2011-жылы православ храмынын түндүк дубалына “Энелердин көз жашы” мемориалдык комплекси курулган.

Бул квадратка орнотулган эстеликтерден шаардын ХХ кылымдын башынан тартып, азыркы күнгө чейинки тарыхын көрүүгө болот.