Токтогул атындагы сейил бак

Оштогу эң эски сейил бактардын бири, 1878-жылы генерал-губернатордун шаардык багы катары салынган. Ошол эле жылдары Ак-Бууранын сол жээгине чиркөө, казына, аскер казармалары жана дарыканасы бар оорукана курулган.

1876-жылы Түркистандын генерал-губернатору Константин Кауфмандын буйругу менен түптөлгөн шаардык бак жаңы Ош уезддик борборунун маданий борбору болгон. Анын курамына азыркы күндө да мурунку аталышы сакталып калган шаар кварталдары кирген: Ташлак-Гузарский, Төрт-Көчө, Андижанский, Шейит-Дөбө, Шейхлар-2 Гузарское, Жидалик, имам Ата, Арча-Мазар, Рабат көчө жана башкалар.

Ош уездинин биринчи уезддик башкармасы болуп, Михаил Ионов дайындалган. Ошол кездеги шаардык бактын – азыркы Токтогул атындагы сейил бактын жана Жогорку Увам каналынын жээгине курулган мурунку шаардык Эс алуу үйүнүн тарыхы анын аты менен байланышат.

Бактын жаңы тарыхы совет бийлиги орногондон кийин башталган. 1918-жылы Ак-Бууранын жээгине сейил бактын жогорку бөлүгүнө согушта көз жумган алгачкы комсомолчулардын бири Владимир Голубевдин сөөгү коюлган. Голубев өзүнүн сөөгүн дарыянын жээгиндеги үч теректин арасына коюуну тирүүсүндө аманат-керез кылган. Кийин комсомолчулардын демилгеси менен мурунку бактын ордуна шаардык сейил бак курулган.

Сейил бактын жалпы аянты 12 га. Сейил бакта күмүш терек, мажүрүм тал, туя, арча, клён, акация өсөт. Сейил бактан эски каналдардын бири болуп саналган Жупас-Арык каналы агып өтөт, ал борбордук аянттан жашырылып өтүп, “Нават” чайханасы жактан пайда болот жана андан ары Сулайман-Тоо тарапка агып кетет.

1934-жылы сейил бакка кыргыз акыны Токтогул Сатылгановдун ысымы ыйгарылган. 1968-1969-жылдары сейил бактын башкы кире бериши оңдолуп, акындын эстелиги орнотулган. 

Сейил бактын жайкы театры чоң сахналарда ойноого уруксат берилбеген жергиликтүү жана келгин рок-топтордун өнөрлөрүн көрсөтүүчү жайы болгон. 1988-жылы бул жерде питердик “Браво” тобу, 1993-жылы Оштун “Новое время” хэви-металл тобу алгачкы концерттерин беришкен.